ಅರಿವು

"ಮನದಾಂತರಾಳದ ಮಾತೆಲ್ಲವ 
ಮೊಗೆಮೊಗೆದು ಸುರಿದಿರುವೆ 
ಹೃದಯದ ಬಾವಿಯು ಬತ್ತಿಹೋಗಲು 
ಇನ್ನೆನನು ನೀ ನಿರೀಕ್ಷಿಸಿರುವೆ?"

"ನಾ ಸುರಿದ ಮಾತೆಲ್ಲವು 
ಫಲಿತಾಂಶವನಂತು  ಕಂಡಿಲ್ಲ 
ಕಂಡುಕೊಳ್ಳಬೇಕಿದೆ ನನಗೆ ನಾನೇ 
ನಿರೀಕ್ಷೆಗೂ ಮೀರಿದ ಉತ್ತರ"

"ನಾನು ತಪ್ಪಿದ ದಾರಿಯನು  
ಮತ್ತೆ ಹುಡುಕಬೇಕಿದೆ ಕತ್ತಲಲಿ 
ನನ್ನೊಳಗಿನ ಅರಿವೇ ಇಂದು 
ನನ್ನ ಬಾಳಿನ ದೀವಿಗೆಯಾಗಬೇಕಿದೆ"


ಶ್ರೀನಿವಾಸ್ 

ಬಾಲ್ಯ

"ಇಂದೇಕೋ ಎನ್ನ ಮನಸ್ಸು 
ನನ್ನ ಬಾಲ್ಯವ ಹುಡುಕುತಿದೆ 
ನಾ ಅಲೆದ ದಾರಿಯಲಿ 
ನಾ ಕುಣಿದ ಬೀದಿಯಲಿ"

"ಎಂದೆಂದಿಗೂ ಹಚ್ಚ ಹಸಿರು 
ಬಾಲ್ಯದ ಆ ನೆನಪುಗಳು 
ಮರೆಯಲೆಂದರು ಆಗದ 
ಹಾಸ್ಯದ ಕುರುಹುಗಳು"

"ಒಂದೇ ಉಸಿರಲಿ 
ಏರಿದ ಗಿರಿಕಂದರಗಳು 
ನನ್ನ ನಲಿವೆಗೆ ಸ್ಪಂದಿಸಿದ 
ಮರಗಿಡಗಳು ನನ್ನ ಕಾಡಿವೆ"

"ಮುಪ್ಪು ಕಾದು ಕುಳಿತಿದೆ 
ಎಂದಿವನ ಆವರಿಸಲೆಂದು  
ಎನ್ನ ಮನಸ್ಸು ಹೊರಳಾಡಿದೆ 
ಕಳೆದ ಆ ದಿನಗಳು ಬಾರವೆಂದು"


ಶ್ರೀನಿವಾಸ್ 

ಹೋಳಿಕ

"ಹೋಳಿ ಭಾವನೆಗಳ ಸಂಕೇತ 
ಅಹುದು ಆ ಹೋಳಿಯಲ್ಲಿ 
ನನ್ನಜ್ಜಿ ಹೋಳಿಕಾಳ ಶೋಕವಿದೆ 
ವಿಕೃತಪಿಪಸುಗಳ ಮೋಹಕ್ಕೆ 
ಬಲಿಯಾದ ಗೋಳು ಇದೆ"

"ಸದ್ಗುಣಗಳ ಮೈವೆತ್ತ 
ಸಕಲ ಸಂಪನ್ನಳು 
ದುಶ್ಚಟಗಳ ಧಿಕ್ಕರಿಸಿ 
ಸದ್ಗುಣಗಳ ಸನ್ಮಾನಿಸಿ 
ಸದಾಚಾರಗಳ ಭೋಧಿಸಿದ 
ಸದ್ಗುರು ಅವಳು "

"ಸುರಪಾನವ ತ್ಯಜಿಸೆಂದು 
ಬೋಧಿಸ ಹೋರಾಟ ನನ್ನಜ್ಜಿಗೆ 
ಸುರಾಸುರ ಕಾಣಿಕೆ ನನ್ನಜ್ಜಿಯ 
ಶೀಲ, ಪ್ರಾಣ ಹರಣ 
ನಿವಾಡುವ ಹೋಳಿಯಲಿ 
ನನ್ನಜ್ಜಿ ಹೋಳಿಕಾಳ ಅಸ್ಥಿ ಇದೆ "


ಶ್ರೀನಿವಾಸ್ 

ಪ್ರೀತಿಯ ಮಡಿಲು

"ವಸುಧೆಗೆ ವರ್ಷಧಾರೆಯ ತಂಪು 
ಪ್ರೇಮಿಗೆ ಪ್ರಿಯತಮೆಯ ಕಂಪು 
ಏನಿದೆಯೋ ಪ್ರೀತಿಯ ಒಡಲಲಿ 
ಬದುಕಿಹೆ ನಿನ್ನಯ ಮಡಿಲಲಿ"

"ಪ್ರೀತಿಯ  ರೂಪವೇ ಪ್ರೇಯಸಿ 
ಸಲಹು ಪ್ರೀತಿಯ ಪ್ರೀತಿಸಿ 
ಗೊಂದಲಗಳು ಇರಬಹುದು ಲೋಕದಲಿ 
ಬರಬಹುದು ಕದುಕಷ್ಟಗಳು ಬದುಕಿನಲಿ"

"ಸಾಗಿದೆ ಜೀವನವು ಏರಿಳಿತದಲಿ 
ಶೋಧನೆ, ಸಾಧನೆಯ ಗುಂಗಿನಲಿ 
ಕೊನೆಗೆ ತಿಳಿವುದು ಪ್ರತಿಯೊಬ್ಬರಿಗೂ? 
ಹಂಚಬೇಕು ಪ್ರೀತಿಯ ಎಲ್ಲರಿಗೂ!" 


ಶ್ರೀನಿವಾಸ್